منى لبست عبايتها العصر ومشت ناس عمتها ، سلمت عليهم وقعدت ..ليلي كان بتعاين لي دبلتها سااااااي ،سؤال سؤالين ومنى بترد وبتسكت ،ومنى كل ما تعاين في وشوشهم تقرف ،
ليلى:منى حسي إنتي مبسوطة بالغريب ده:-\ خطيبك قصدي ؟
منى:الحممممممد لله إنك قلتي خطيبك ،ماحأرد عليك يابت وداد ،كدي إنتي جوابي عللي سؤالي ده :حسي إنتي مبسوطة مع الغريب؟ راجلك قصدي ،ولا يكون هو ود عمتنا وأنا ما جايبة خبر ،مش راجلك ده برضو غريب ؟ولا ليكم غفور رحيم ولينا شديد العقاب!
ليلي بقت تتمتم:آآ ماهو راجلي لكن وأنا عاشرتو ووعرفتو ومبسوطة آي مالي ما بكون مبسوطة يعني
وداد عمتها بي إستغراب :بت وداد ! مالك معانا يامنى في شنو؟!
منى:آي بت وداد .مالها مابتك دايرة تنكريها ! ، ومالي؟شايف علي شنو؟ حسي في زول مننا بيسألكم مالكم معانا؟ آآ؟
وإنتي يا ليلي قلتي لي عاشرتي الغريب خلاص وعرفتيهو ؟! أها أنا إبراهيم عرفتو قبل ما أدخل بيتو ،زول دغري وواضح وما عندو لف ودوران ،ةوظل ماسك دربو ما زي الغيرو ...
ليلي:تقصدي شنو يعني؟هيييي يامنى
منى:أول شئ وطي صوتك وإتكلمي بي إحترام ،)منى كانت بتتكلم بكل أريحية وما حارقة أعصابها( مالك حسي هايجة كدة ،أنا قلت شئ ؟! ولا الحرامي الفي رأسو ريشة.........
وداد:أجيييي يابت أحمد مالك مقبلة علينا عملنا ليك شنو نحنا
منى:والله!! وكمان بتسألي ؟!!! هو إنتو الماعملتهو شنو ،آآ ؟ قولي لي شئ كدة ما عملتو فينا مما أنا قمت ووعيت علي الدنيا، العارفاه أنا ما هييين والله أعلم في شنو أنا ماعارفه من وراي،
حقد وغل حسد وضغينة ومااااا بتحبو لينا الخير نهائي ،مالكم آآ؟ مالكم معانا ؟ عملنا ليكم شنو ياخ؟ ما ناس كافين خيرنا ،شرنا وماعندنا شغلة بي زول!في شنو ؟
)إنت يا عمتي البقيتي إسم عمة بسسسسس ما أكتر (أبوي عمل ليك شنو ،ياخ أحمد عزيز ده مابيشهدو ليو إلا بالخير وإنتي أكتر واحدة عارفة كدة،مالك معاو عمل ليك شنو أبوي ده؟عشان أحسن منك؟عشان مابياكل إلا حلال؟ ؛عشان نضيف من جوة ؟ولا عشان جدي كان بريدو أكتر منك ومن أخواتك ؟مالو ،ما ولدو ؟يريخحو زي مايريدو ياخ ،
وداد بقت متخلعة وماقادرة ترد.
ليلي بي صوت عالي :قوووومي أطلعي برة،برة
منى هاجت فيها ووقفت علي حيلها :لا والله!!! برة! شكلك متأثرة بالمسلسلات الحارساها ليل ونهار ،ماااااا عدم الموضوع مشكلة ،شوفي يابت الناس أنا أجي هنا وكت ما دايرة وأطلع بي كيفي ،كيفي أنا ،إنت ناسية نفسك ولا شنو؟! حبيبتي البيت الإنت مرزوعة فيهو ده حق جدييي أنا ،أبو أبوي زي ما هو أبو أمك،ولينا فيهو حق زي ما ليكم ،لالا دقيقة لينا فيهو حق أكتر من الليكم ،يعني عادي بكرة لو دايرنا نشردكم مابغلبنا ،لكن معليييش حاج أحمد طيبتو متملكة قلبو ؛ومابتهونو عليو ،
بعدين تعالي الفصاحة ليك شنو ؟! مش إنتي عرستي خلاص ،راجلك ذاتو المقعدو هنا شنو ؟! يعني يا إنتي لو في زول يطلع برة إنتي وراجلك المن طينتك ده؛ أول ناس تتكشو برة،
و أها أنا الليلة ما طالعة من هنا إلا أطلع كل الجوايا وأقولو ليكم في وشكم،في وشوشكم المليان خبث دي ،مالكم بتعاينو لي كدة ،مستغريبن ؟!لا ياخ !
ما دي حقيقتكم.
)ليلي خافت من منى وبقت ساكتة (..
منى قبلت علي عمتها وداد:وإنت ياااا كبيرة العيلة ،أخجلي علي شيبتك دي ،بدل تمشي وراء سكة أولادك عقليهم،كدي النسألك سؤال واحد:إنتي قلبك ده بيحن يعني بتحسي إحساس أي أم عادي ولا في خلل؟ لا ما تجاوبي، كدي فهميني إنتو الحسد والغيرة ما بتعرف غيركم أصلآ ولا بيفكرن يمشن منكم يوم؟ يعني حارسات قلوبكم إنتو بس ؟يوم واحد بس ؛يوم واحد مابخلنكم ،آآ؟
سيرتنا علئ طول في لسانكم ،ما بالخير طبعآ،ماهو لو بالخير البطن مافيها مغسة ،تقطعن فينا وغير القطيعة ما عندكن شغلة ،ياخ مالكم ياخ ،
ويااااا عمتي بتقولي منى جارية وراء ولدي لكن كان تموت ما يعاين ليها..
ههههههه ماهو أنا إحتجت سنة عشان أستوعب الكلام ،أستوعبو بسسس ،ولدك ده شنو ؟ الماعندو شغلة البجيك أنصاص الليالى؟الحارس الشارع ويعاين لي بنات الناس الماشة منو والجاية منو؟
لا ثواني مش ياهو ولدك المفلفل شعرو ولابس ليهو كشب مالي إيدو وحاجات تانية ماف داعي أذكرها ،ياهو ولا واحد تاني آآ؟
ده أجري وراو أنا !!!!!
ياخ طيب لما أجري ما أجري لي وراء زولآ نافع ،منو رجا
)وداد بقت مقلعة عيونها وبتعاين لي منى(
وداد :ووو الكلام ده الجابو ليك منو .هووووي يامنى أنا ماقلت الكلام ده .إنتي بتتهمي في الناس ساي؟
منى:لا قلتيهو تب ،
إنتي عارفة وأنا عارفة إنك قلتيهو ،يامرة ما تخجلي وكمان بتكضبي .وقلتي الأكتر منو كمان ،ومابراك ،بتك وأختك ذاتن قالن ،
ولي علمك ولدك ده سف التراب وراي وأنا سلام الله ما كنت بديهو ليو ،جاء عكس ليك الحكاية وبيقول منى جارية وراي !
ولا يكون قال ليك أنا دايراها وهي ما مدياني وش ،وإنتي العكستي الحكاية o_O ،
طبعآ أنا بتوقع منكم آيييي شئ والله،
وولدك العاجبك حالو المايل ده أنا أجيب سيد سيدو وأهو جيبتو وإنت براك شايفة بي عينك..
وإنتي ياااا ليلي من متين أنا بعمل كريمات لي وشي؟!
لا وما أعمل المشكلة شنو يعني فهميني؟ إنتي الواجعك شنو؟
أنا مما قمت إنتي بتكرهيني ماعارفة أنا عملت ليك شنو !،لوني ده مما أنا صغيرة بلعب في الشارع وكنتي بتدقيني كدة، حسي لما كبرت بتقولي
بتجلط في الكريمات الليل والنهار عشان تجيب ليها واحد.ههههههه فرضآ أنا جلطت أها بي فايدتو ظهر فيني الكلاأاام علي البجلطو بالجد وما ظاهر فيهم ..
وبالنسبة لخالتك الزيكم وواحد دي ،،طبعآ ما محتاجين وصية عشان تقولو ليها كلامي ..
قولو ليها حاج أحمد ربى ،ربى أولادو كوييييس تربية هي ما ربتها لأولادها، وعزيز البتتكلم عنو
ده لو عجنو أولادها كلهم مابيجبو ضفرو ،
لالالا ماتستغربو الكلام ده جبتو من وين ،ماهو إنتو قلتو وده المهم في الموضوع ..
ده كلام مرة واحدة ،الله ربي أعلم تكوني قلتو شنو تاني ..
أهاااا وقبل ما أنسي أمي ما بتتلصق فيكم ساي ،أمي مرة أصيلة ،ستكن كلكن، وبتعرف في الأصول الإنتو طبعآ ما بتعرفو دربها ...
عشان بتتعامل معاكم وبترسل ليكم ذادنا تمشو تقولو عنها بتتلصق فيكم ساي! هههههه والله علي قول المثل )الحسنة في الما بسواها مغسة للسواها (
وأنا يااااما كلمتها إنو مافيكم فايدة إنتو ،ولو عملنا السبعة وزمتها مابيجي منكم غير الشر ...
آآآي عاينو لي كوييس ،مستغربين!!!
والله أنا غايتو قلت ليكم كلامي في وشكم ماخايفة من شئ ولا بطعن تحت تحت،ولااااا عندي ليكم شئ أصلآ
وحسي أنا متأكدة طلعتي بي جاي حتمسكو سيرتي الليل وحأكون ونسة جبنتكن الأيام الجاية ،
بككككرة يا ليلي حتضرب لي خالتك تجيبها علي وشها من الصباح عشان تحكي ليها السناريو بي دقة ،ههههه طبعآ لو ما جبتيها بي باقي الليل ده ..
عمومآ أنا مربية ياعمتي ماتغلطو وتقولو علي ما مربية وعلت صوتها وقالت وقالت،أنا عارفاكم حتألفو وتذيدو الكلام وتعملوهو موضوع ..أنا قلت كلامكم البتقولو عننا ماجبت شئ من عندي، طلعت الجواي وإن كان مر عليهو زمن طويل ..
)وداد بقت بتهز في رأس وما عارفة تقول شنو لأنو كلام منى كلو حقيقة (
منى:وطلب صغييييير كدة يا إنتو ...عليكم الله خلونا في حالنا ...
وأنا والله العظيم وجلال ربي أسمع إنكم غلطتو في حقنا بي كلام وإن كان مع الجيران ولا لمتكن الخبيثة البتعملنها لشيل حال الناس دي ،إلا أفرج فيكم أمة لا إله إلا الله والبعملو حتعرفوهو بعدين..
وعاينو هييييي ماتقولو أنا بعد قلت كلامي ده ما حأجي البيت ده تاني وما حأتكلم معاكم ولو لقيتكم في الشارع أعيان ليكم بطرف عيني وحأقاطعكم والكلام ده ،لالالالا الكلام ده أنا عارفاه من زماااااان وما طلعتو من قلبي ،كتمتو ساي وقطعت الحركة وجيت الليلة طلعتو ،ومامستعدة أقطع رحمي وأجيب لي روحي ذنوب بي سببكم ،مش إنتو برضو أهلي o_O !!
وأقول ليكم شئ أها الجمعة الجاية جاياكم ،إن شاء الله أتكلم مع الحيط كان أبيوتو تستقبلوني ،صلة الرحم برضو مهمة يا عمتي .
وحق الله بطلعو مني وأنا راااضية ..
)منى إستفزت ليلي شديد بكلامها بس ليلي كانت ما قادرة تقول أيييي شئ (
ليلي إتحركت ماشة علي الباب ووقفت فجأة :
أهاااا قبل ما أنسى يا ليلي أنا لو كنت خبيثة زيك ،كان إنتي تكوني طليقة الأستاذ أحمد في الوقت الحالي ،لكن أنا براعي يااا بت عمتي ..
ونصيحة مني ليك : أمسك عليك حاجتين :لسانك ،وراجلك ..
منى طلعت منهم وليلي بقت تبكي وأمها مصدومة من الكلام وبقت متوترة أول مرة تشوف منى تتكلم كدة والوجعها أكتر إنو كلام منى كلووووو صاح ،،،
منى جنب باب الحوش البرة لاقت أحمد راجل ليلي...
أحمد:منى ، مابدري مالك طالعة؟!
منى عاينت ليو مسااافة وقالت ليو :إتفضل إتفضل البيت بيت ياخ ..بيتك
ومشت منو ،أحمد إستغرب ودخل البيت لقى الدنيا مقلوبة ...
منى رجعت البيت وأول مافتحت الباب..
حاجة رحمة بي نهرة:منى ! إتأخرتي لي شنو ؟ الدنيا ليلت يابتي ده كلو عند ناس عمتك ؟!
منى حضنت أمها شدييييييييد:آآآخ يا أمي لو تعرفي أنا الليلة مبسوطة قدر شنو ..
ليست هناك تعليقات:
إرسال تعليق