منى صحت الصباح حاسة بي جسمها تقيل بس ما إشتغلت بالموضوع كتير ، صبحت علي ناس البيت..
حاج احمد:منى يلا تعالي أشربي الشاي
منى:مادايرة يا أبوي حاسة بي بطني طامة ولو شربتو حتتطم ذيادة ،عشان اللبن
حاج أحمد:إنت كويسة؟؟ حاسة بي شئ؟
منى:لالا مافيني إلا العافية يا أبوي ،أها وعشان أرضي عليك حأشرب لي كباية عصير ،حأسويها وأجي أشربها جنبكم ..
حاجة رحمة:الحمد لله الأيام دي شوية شدت حيلها ، والسهر خلتو شوية ،القراية دي بتكتلها يوم البت دي ...
منى شربت العصير وإونست معاهم عادي.
حاجة رحمة:منى إنتي الليلة شغالة الساعة كم ؟
منى:شغالة10 يا أمي ، وبخلص 6
حلجة رحمة:خلاص كويس وصلي معاك حمودي الروضة في طريقك، أستاذة أمل ضربت لي قبل شوية وقالت الترحيل ما حيجيهم الليلة ،
منى:خلاص كويس يا أمي ،عزيز عليك الله أغشى معاك عمو سعيد أمس سأل منك وقلت ليو تلفونو ما شغال ،قال لي خلاص خليهو يغشاني .
عزيز:الله! والله طلع من بالي المرة الفاتت قال لي تعال لي داير كم حاجة من المغلق ،لكن بغشاه الليلة إن شاء الله.
منى: يلا ياحمودي نمش.
حمودي:انا جاي ماتفوتيني ، لكن يامنى جزمتي إتفكت
منى:مامشكلة حبيبي انا اربطها ليك حسي .. يلا
حمودي:دقيقة أودع أمي وأبوي
منى ضحكت وحيلها تعبان :ههههه إنت ماشي وين حبيبي ماحتجي بعد 6 ساعات ..
حمودي باس أمو وأبوه وهم يضحكو عليو ..
حمودي:مع السلاماااااااأ
حاجة رحمة:حمودي بعدين أكل أوعى تجيني راجع بالأكل بدقك
حمودي ومنى ماسكاه من إيدو :ولا حتدقيني ، تلو ملة بتقولي لي كدة
حاجة رحمة:ههههههه لالا المرة دي الخرطوش قااااعد ..
منى:يلا يا جماعة نحنا طلعنا
حاجة رحمة:في رعاية الله يابتي ...
منى وصلت حمودي الروضةوطول الطريق حمودي كان يتكلم معاها ، بعد داك مشت الجامعة،وفي الجامعة :
جعفر:منوش يامنوش ،صراااحة الأسود لا يليق بك نهائي
منى:إشمعنا الليلة؟ماعادي بلبس أسود ،الأسود أناقة يا جعفوي
جعفر:ماعارف مبقيك كئيبة ياخ o_O ،ألبسي وردي ، كبدي ،قلبي ؛فشفاشي إن شاء الله جعفري ياخ
منى:ههههههه جعفر والله إنت رايق ،لبست أسود عشان العباية ،مابحب ألبس معاها ملون ..
جعفر:أيييييوة كدة ياخ أضحكي خلي الدنيا بطنها تطم قصدي تضحك معاك..
أها القراية ماشة كيف
منى:الحمد لله زهجت منها ياخ ،دايرة الإمتحانات تجي عشان ننتهى من موضوعها
جعفر:يابت تجيك الكشة ،أنا لسة مافتحت أي شئ والله ولا ناوي أفتح قريب ذاتو
منى:وراجي شنو يا النجيض ،جعفر والله المواد دي تقيلة ،أبدأ ساي يا أخوي.وين باقي الشباب ديل .
جعفر:حأحاول والله،حأحاول بس .الشباب طلعو القاعة ..يلا نحنا نلحقم كمان
منى دايرة تقوم رأسها لف قعدت وبقت بتهز في رأسها .
جعفر:بسم الله مالك يا حبوبة ؟! منى رأسك لافي إنت؟
منى:حاسي رأسي تقيل يمكن من السهر
جعفر:ماااااا قلنا الحب الكتير ده خلوه يا جماعة ،الليل كلو معدياه خلط
منى:الخلط بي قروش ،جعفر جيب لي موية
جعفر:خلاص أقعدي قبلك ماتتحركي لحدي ما رأسك الكبير ده يستقر ماتمشي تقعي لينا ماناقصين تلتلة
منى:ههههه والله صحي أب سن يضحك علي أب سنين .أمشي أمشي..
جعفر جاب الموية لمنى شربت وبعد كدة طلعو القاعة ...
خلصت المحاضرة وبقو جايطين
عفراء:منوش كيفك مالاقيتك قبيل ،جيت متأخرة كالعادة ..
منى:أهلين عفورتي ،الله سترك ساي ،غريبة الراجل ده ما طرد الليلة.
عفراء:قريت ليو يس ،شكلو مبسوط ،إنتو الليلة يوم كم ؟
يمكن صرفو ليهم المرتب o_O .
أمجد:هههههه والله يمكن ياعفراء ،ماتستبعدي .لكن ده نص الشهر يا مكشكشة .
منى:أمجد ، نظارتك وين؟ شكلك غريب من دون نظارة طبعآ
أمجد:زهجت منها ختيتها في شنطتي ، شكلي وجيه صح ، بس ما تمشو تتكسرو فيني
هالة:ههههههههه ياراجل ! أحسن تلبسها عشان سهام عيونك الأصلآ صغيرة دي ماتكتلنا ،
منتصر:أنا جيعان يا جماعة ،مافي زول عندو حاجة أقزقز بيها ؟
لمياء واقفة بعيد وقاعد جنبها طارق ، ويتنادي في منتصر:منتصر ، ياااااا منتصر ،
طارق عليك الله كورك لي للود ده ما سامعني .
طارق:يااااا منتصر
منتصر :حبيبنا
طارق :الحكومة الحكومة دايراك
لمياء ضربت طارق بالدفتر حكومة في عينك يا ود ، كان أحسن أمشي ليو براي .
أمجد:ههههههه ،امممممسك الحكومة طالباك ،هببت شنو؟
ولا يمكن دايرة تفطر معاك ،هي ذاتا قبيل تنقنق قالت مافاطرة لما المحاضرة بدت ،أمشي قبل ما يرسلو ليك جيش.
منتصر:ده كلام ظريف ،ع الأقل تدفع حق الفطور انا والله علي الحديدة .يلا يا شباب أشوفكم بعد غياب حيدوم ساعة ونص .قلبي ما حيستحمل فراقكم ،حأشتاق ليكم والله .
منى:ههههههه والله يامنتصر لا جديت ولا حتجد في حياتك ،أمشي أمشي لمياء دي بتحمر ليك من قبيل ..
طارق جاء لقاهم متلمين:جلسة في الحرم إن شاء الله ،لكن انا ماااا بطمن وكت تكونو لامين كده ،عصابة عديل
أمجد:هههه وإنت جيت تميت الناقصة ،
أمجد حك رأسو وقال :طارق إنت يوم الرحلة قلت لمنى شنو؟
ياخ أسكتي ساي ما تخرب غناي أنا جادي معاك أنا جد بريدك o_O .مش كدة
طارق:هههههه أسكت يا أمجد ،أولآ هي ما تجوطي غناي مش تخربي ،وبعدين أنا جادي معاك أنا جد بهواك مش بريدك .
أمجد:يعني عملت شنو بلاي ا
الخراب والجوطة ماااا أولاد عم ،وبريدك وبهواك ماياهو الهناي ؛يعني الفرق شنو
كلهم يضحكو ...والونسة جرت ..
منى:هييي انا ماشة أصلي الضهر إنتو ذاتكم قومو ،
طارق:أنا عندي وجع ضهر
عفراء:يااا راجل ! أمشي الكفتريا جر ليك أقرب كرسي وشيلو صلي بيو في الجامعة يا مستهبل .يلا يامنى .
منىوعفراء طلعو وقبل ما ينزلو ..
منى:عفراء والله حاسة بي جسمي تقيييييل ماعارفة مالي
عفراء:بسم الله يابت .
آآخ يامنى دقيقة ارجع أجيب محفظتي دايرة احول لي رصيد .
عفراء رجعت تجيب محظتها وطلعت من القاعة وكان وراها طارق وجعفر وتسنيم وماشة علي السلم فجأة شافت منى وقعت في السلم وقعة قوية .عفراء في لحظة يديها بردت وضربات قلبها ذااااااات ورجليها تقلت وبقت تكورك :منى منى ،وجات جارية
ألحقوووني .. ياجعفر ، طارق
جعفر وطارق جو جارييين ومنى لسة واقعة وعفراء قاعدة في عتبات السلم بتحاول تسند منى
جعفر وهو خايف : منى منى ، منى إنتي سامعاني
عفراء بترجق وبقت تبكي ،منى ردي علي حبيبتي
طارق يضرب منو في خدودها:منى منى ،منى
تسنيم مخلوعة وقلبها كأنو إتختت فيو صخرة:منى مالها ياعفراء
جعفر :طارق أسند معاي نرفعها فوق
عفراء ،هي بتبكي :بالراحة يا جعفر
تسنيم بقت واقفة ماقادرة تتحرك وفجأة د.ياسر لقاهم متلمين جاء عليهم :في شنو يا شباب خير ،
فجأة لقى منى وجعفر وطارق ساندنها ،
ياسر: منى .جعفر طارق بالراحة نزلوها نزلوها تحت طوالي ، أجيب مفتاح العربية وأجيكم نزلوها بالراحة. نزلو منى وهي فاقدة الوعي تمامآ
وركبو عفراء وتسنيم وجعفر معاها في عربية د.ياسر وطارق قال ليهم حألحقكم بالمواصلات ..
تسنيم خاتة رأس منى علي رجليها وماسكها بي إيديها وتبكي وفجأة دايرة تقش دموعها رفعت يدها لقت دم ..
تسنيم : دم .هبشت رأس منى تاني لقت دم ،
ما لاحظو للدم لأنو منى كانت لابسة طرحة سودة
تسنيم صرخت : جععععععععفر .منى ......
ليست هناك تعليقات:
إرسال تعليق