هذه ملامح سعادتي (الحلقة الثانية)

كالعادة وزي كل يوم وفي نفس الزمن ،متلمين بشربو في الجبنة ، 
حاج أحمد :مني يابتي دايرة اوصيك وصية وأنا حسي معاك بس مامعروف بكرة الجاي شنو..
منى:خير يا أبوي ؛وماتقول كدة إن شاء الله عمرآ طويل .
حاج أحمد:أهلك يابتي،ماااااا تتقطعي منهم،عشان تريحيني
منى تخت فنجان الجبنة :وااااااي يا أبوي من السيرة دي ،كان تخلينا نشرب جبنتنا بي مزاج وماتعكرنا بيها ،عمومآ يا ابوي إطمن انا تربيتك ،ما بريدم أي لكن برضو حق الله بطلعو مني .. وسبحان الله التقول إنت ما منهم نهائي ،عالم أعوووذ بالله منهم..
اتكلمت منى وكانت مكشرة وبطنها طامة ..
كانت منى بتزور عماتها من فترة لفترة ،بتسلم وونسة في حدود وتبقى مارقة ،كان عندها عمتين وتلاتة اعمام...
وفي يوم جمعة حاجة رحمةأم منى عملت عصيدة بي ملاح روب ،نادت بتها الصغيرة:يااااا مودة ،مودة تعالي سريع ودي العصيدة لي عمتك قبل ما يفطرو ،مودة تطنطن يا أمي انا بخاف من الكلب ؛ماتخافي هو مابيسألك انتي اسكتي ساي وخشي ..منى جات داخلة المطبخ آآآخ يا أمي إنتي متعبك روحك ع الغاضي ساي،الناس دي ماااا فيها فايدة والله..
حاجة رحمة: يابتي هو انا مكلفني شنو أصلآ بيهم وبراهم عمالة ملاحي.سكتت منى. وشالت مودةالصينة الصغيرة في يدها ومشت ناس عمتها .دقت الباب وماجاء زول فتح ليها ،جرت السلك ودخلت ،وماشة علي البرندة وفجأة......
لقيت الجماعة متلمين وآآآآخر ضحك ونسة ،بتكلمو في ناس بيتم ،ماسكين زول زول ..إتصدمت مودة وبقت ترجف،، رجعت بيتم ..
خافت تكلم أمها .ولما شافتها امها:مالك يابت جيتي راجعة ؟!
مودة:بقت تتمتم في الكلام ماهو يا أمي آآ ، الكلب كان جنب الباب وماقدرت أدخل ...
حاجة رحمة:احييييي أنا منك إنتي الواحد مايعتمد عليك في شئ أصلو
ياعزيز ، عزيز تعال لي هنا ،
مودة:عليك الله يا امي خلاص هم اصلآ حيكون أكلو ما تتلتلي الود ساي ..
منى وين يا امي ؟!
شوفيها في الحوش التاني قبيل قالت دايرة تغسل ،،
يامنى ،منى ،جرت مودة وصوتها بيرجف...
منى:مالك يابت ف شنو ؟! وبقت مودة تبكيييي 
منى:يابت خلعتيني ف شنو إتكلمي..
مودة حكت كل الحصل بصوت مخنوق ،نفضت منى يدها من الصابون وإنتهدت تنهيدة كبيرة ..
حسبي الله ونعم الوكيل،مودة حبيبتي ماتشتغلي 
بكلامهم ده ،ديل ناس كلمة وسخين شوية عليهم ...